Rendez-Vous agertokian? Begi bistakoa da talde ona dela. Izan ere, 2014an taldea sortu zutenetik paristarrak etengabe ari izan dira kantuak argitaratzen eta kontzertuak jotzen.
Lehen EPan, new wave doinuak ziren nagusi. Bigarren disko laburra errabiatsuagoa zen eta post-punk giroetan murgiltzen zen. 2018an argitaratu Superior State diskoa bortitzagoa da eta ez da hain elektronikoa. Gainera, taldeak erritmo kutxak bateria batekin ordezkatu ditu.
Diskoaren koherentzia orokorra zaintzeagatik, orain boskote gisa ari den taldeak kantu elektronikoenak baztertu behar izan ditu. Baina bilakaera hau ez da behin betikoa, taldeak beti eragin desberdin anitz jaso baititu eta konplexurik gabe sortzen segitzen baitu. “Denetarik entzuten dugu: rock, rap, black metal, pop edo techno. Musika batek eragin gehiago jaso eta are interesgarriagoa bilakatzen da. Gaur egun rock musika egitera mugatzen bazara, laster kakingarria bilaka daiteke…” Rendez-Vous taldearekin ez dugu aspertzeko arriskurik, ez!

 

Crocodiles: 2009az geroztik, Charles Rowell eta Brandon Welchez bikoteak gitarra anitz bihurdikatu eta melodia bikainak bata bestearen ondotik asmatu ditu. Hitz gutxitan: distortsioa, reverb efektuak eta shoegaze musika. Crocodiles taldea Kaliforniako hezetasunaren eta 1990eko hamarkadako Sonic Youth eta My Blooody Valentine noise taldeen arteko lotura da. Arras emankorra eta kalitate handikoa. Lehen bi diskoak Fat Possum Records diskoetxearekin argitaratu zituen, ondoko biak French Kiss Records-ekin, eta, azkenik, beste bi Zoo Music-ekin. 2019ko otsailean, Deaf Rock Records diskoetxeak Crocodiles-en Love is Here disko berria kaleratuko du. Zazpigarren lan horretan, taldearen bilakaera nabari da: soinu hotzagoak, baina beti bezain itsaskorrak. Ezagun da taldeak dentsitate handiko kontzertuak ematen dituela. Rock’n’roll momentu handia biziko dugu, zalapartatsua eta arras efikaza.